Benjamin Schoonwinkel, 'n 59-jarige Afrikaner, is reeds vir byna 100 dae in 'n federale aanhoudingsentrum in Georgia in die Verenigde State nadat hy 'n asielaansoek ingedien het toe hy op 'n toeristevisum in Atlanta aangekom het. Volgens The New York Times en IOL is Schoonwinkel sedertdien in aanhouding.
Schoonwinkel, wat beide Engels en Afrikaans praat, het in September van Johannesburg na Atlanta gevlieg en by aankoms aan Amerikaanse grensbeamptes gesê dat hy asiel soek. In plaas daarvan om die amptelike Amerikaanse vlugtelingprogram te volg, het hy op sy toeristevisum die land binnegegaan en asiel probeer vra. Hy is onmiddellik in boeie gesit en binne twee dae na die Stewart-aanhoudingsentrum oorgeplaas, waar sowat 2 000 mense aangehou word.
Sam Busa, stigter van Amerikaners, 'n amptelike verwysingsvennoot van die Verenigde State se departement van buitelandse sake vir die Suid-Afrikaanse vlugteling-toelatingsprogram, het gesê dat die omseiling van die amptelike roetes ernstige gevolge inhou. Sy sê: "Dit is waarom dit noodsaaklik is om die reëls te volg. In plaas daarvan om behoorlik aansoek te doen vir status as vlugteling deur die amptelike proses, soos andere al suksesvol gedoen het, het 'n 59-jarige Afrikaner van Johannesburg met 'n toeristevisum na Atlanta gevlieg en toe asiel direk by die lughawe gevra."
Schoonwinkel deel tans volgens The New York Times 'n slaapsaal met ander onwettige immigrante, meestal Spaanssprekend, en dra 'n blou uniform soos ander nie-kriminele gevangenes. Hy verdien twee Amerikaanse dollar per dag vir skoonmaakwerk en slaap op 'n metaalstapelbed. Hy is een van min wit gevangenes, wat by ander gevangenes verwarring veroorsaak. Schoonwinkel sê: “Hulle vra almal vir my, ‘Wat maak jy hier?’”
In sy asielaansoek beweer Schoonwinkel dat hy op grond van sy ras, politieke oortuiging en lidmaatskap van 'n spesifieke sosiale groep vervolg is. Hy sê dat hy in Desember 2014 op sy plaas deur twee swart mans aangeval, aangerand en met 'n mes gedreig is, terwyl sy eiendom geplunder is. Volgens hom het dié voorval tot diep emosionele letsels gelei en dat dit uiteindelik daartoe gelei het dat hy sy grond uit vrees vir sy veiligheid verkoop het.
Die Trump-administrasie het intussen alle ander vlugtelingprogramme tydelik opgeskort nadat 'n Afghaanse burger in hegtenis geneem is, berig Radio Orania. Karoline Leavitt, perssekretaris van die Withuis, het beklemtoon dat toelaatbare immigrasie feitlik op nul gestel is, met die uitsondering van Afrikaners wat weens vervolging uit Suid-Afrika vlug. Spesiale immigrasievisums – een van die wettige maniere om toegang te kry – word ook heroorweeg. Die stelsel is verder verstram ná onlangse aanvalle op Amerikaanse Nasionale Wag-lede, wat veiligheidskwessies by beleidsbepaling voorop stel.